​ក្រុម Manchester City ដែល​កំពុង​នាំមុខ​លើ​តារាង​ក្របខ័ណ្ឌ​អង់គ្លេស Premier League នឹងត្រូវ​ធ្វើដំណើរ​ទៅ​ជួប​ក្រុម​ម្ចាស់​ជើងឯក Europa League គឺ Sevilla នៅ​ថ្ងៃ​អង្គារ​នេះ ដោយ​មានបំណង​បង្ហាញថា ពួកគេ​នឹងមិន​ភ្លាត់ស្នៀត​ក្នុង​ក្របខ័ណ្ឌ Champions League ម្តងទៀត​នៅ​រដូវ​កាល​នេះឡើយ​។

​គ្រាប់​បាល់​ស៊ុត​បញ្ចូល​ទី​នៅ​ជិត​បញ្ចប់​ការប្រកួត​របស់​ខ្សែបម្រើ Kevin de Bruyne បាន​ដណ្តើម​ជ័យជម្នះ ២-១ សម្រាប់​ក្រុម Man City នៅពេលដែល​ក្រុម​ទាំងពីរ​ជួបគ្នា​កាលពី​២​សប្តាហ៍​កន្លងទៅ​ក្នុង ទីក្រុង Manchester ដើម្បី​ជួយ​ឲ្យ​ក្រុម​របស់លោក Manuel Pellegrini ស្ថិតក្នុង​ទីតាំង​រួមជាមួយ​នឹង​ក្រុម Juventus ក្នុងការ​ឈានទៅ​វគ្គ​បន្ត​ពី​ពូ​ល​ដ៏​លំបាក​មួយ​ដែល​ក៏មាន​ក្រុម Borussia Monchenglabach ផងដែរ​។​

​បើទោះបី​ចំណាយ​ប្រាក់​ជាច្រើន​ក៏ដោយ ប៉ុន្តែ Man City មិនបាន​ឆ្លង​ផុត​វគ្គ​១៦​ក្រុម​ចុងក្រោយ​នៃ​ក្របខ័ណ្ឌ Champions League ឡើយ តាមរយៈ​ការធ្លាក់​ចេញ​ក្រោម​ស្នាដៃ​ក្រុម Barcelona ក្នុង​រយៈពេល​២​រដូវ​កាល​ជាប់ៗ​គ្នា​។

​ក្រោយពី​ការចាប់ផ្តើម​យ៉ាង​ខកចិត្ត​ក្នុង​យុទ្ធនាការ​នេះ​តាមរយៈ ការ​ចាញ់ ២-១ ក្នុងផ្ទះ​ខ្លួនឯង​ក្រោម​ស្នាដៃ​ក្រុម Juventus ក្រុម Man City បានផ្តល់​ឲ្យ​ពួកគេ​នូវ​ឱកាស​មួយ​នៃ​ការ​ឡើងឈរ​នៅលើ​កំពូល​តារាង​ជាមួយនឹង​ការកត់ត្រា​ជ័យជម្នះ​២​លើក​ជាប់ៗ​គ្នា​ដើម្បី​ដេញតាម​ពីក្រោយ ក្រុម​ម្ចាស់​ជើងឯក​អ៊ីតាលី Juventus ត្រឹមតែ​១​ពិន្ទុ​។

​ខ្សែបម្រើ Yaya Toure ដឹង​យ៉ាងច្បាស់​ថា Man City ត្រូវតែ​ចាប់ផ្តើម​បង្កើត​ឲ្យ​មាន​ឥទ្ធិពល​មួយ​ក្នុង​ក្របខ័ណ្ឌ Champions League ប្រសិនបើ​ពួកគេ​ចង់​ឲ្យ​ពួកគេ​ស្ថិតក្នុង​ចំណោម​ក្រុម​ជើង​ខ្លាំង ប្រចាំ​ទ្វីបអឺរ៉ុប​។

​កីឡាករ​រូបនេះ​បាន​ប្រាប់​គេហទំព័រ​របស់​ក្លិប​ថា​៖ «​នៅពេលដែល​ខ្ញុំ​បានមក​ក្លឹប​នេះ ខ្ញុំ​មក​ដើម្បី​លើក​ពាន​។ យើង​ដឹងថា ក្នុងការ​ក្លាយជា​ក្លឹប​ដ៏​ធំ​មួយ យើង​ត្រូវតែ​បន្ត​ការ​ឈ្នះ​ពាន​សំខាន់ៗ និង​បង្កើត​ប្រវត្តិសាស្ត្រ​របស់​យើង​នៅ​អឺរ៉ុប​»​។ ការប្រកួត​នៅ​រាត្រី​នេះ នឹង​ចាប់ផ្តើម​នៅ​ម៉ោង​២:៤៥​ទៀបភ្លឺ​៕

​ប្រភព​៖ cambosport
​